падарожжы

Да моманту распаду СССР беларусы ў асноўным падарожнічалі ў межах “саюзу”. Гэта былі культурніцкія вандроўкі (арганізаваныя працоўнымі ўстановамі экскурсіі ў музеі і месцы вайсковай славы альбо гарадскія экскурсіі), аздараўленчыя выезды па партыйных “пуцёўках”, індывідуальныя турыстычныя вандроўкі (на мора альбо паходы ў горы). Падарожжы за межы СССР ўскладняліся неабходнасцю атрымаць дазвол на выезд і зазвычай абмяжоўваліся выездамі ў краіны “сацыялістычнага блоку”. 

У перыяд “перабудовы і галоснасці” насельніцтва краіны атрымоўвае больш свабоды ў перамяшчэннях. Пасля абвяшчэння незалежнасці Рэспублікі Беларусь вялікую колькасць выездаў складаюць так званыя “камерцыйныя” вандроўкі за дэфіцытным таварам у іншыя краіны былога СССР і “сацыялістычнага блоку”. Адны з цікавых падарожжаў беларусаў пасля абвяшчэння незалежнасці краіны складаюць таксама аздараўленчыя выезды дзяцей і дарослых па праграме “дзеці чарнобыля”. Праграма была арганізаваная ЮНЭСКА і дапамагала выехаць на лекаванне і медычнае даследаванне дзецям, якія жылі у мясцовасцях забруджаных выкідамі радыяцыі пасля Чарнобыльскай катастрофы ў 1986 годзе . Геаграфія гэтых падарожжаў ахоплівала вельмі шмат эўрапейскіх краін, як паўночнай, так і паўднёвай Эўропы.